मेरे आपणे
माड़े टैम मैं लोग कहवैं सैं राम नही होता मनै मेरे आपणे आज थोपडा फेरते देखे हैं
कोई पेट भरज्या तै पाज्या खुशियां अपार
कोई लाखां मैं भी खेल क़ै संतुष्ट होवै ना
अर कोई आपणे कातिल तै भी रुष्ट होवै ना
येँ तो न्यारे न्यारे मत सैं ज़माने के मरयार
100 रपियाँ मैं माणस गाल मैं हेरते देखे हैं
माड़े टैम मैं लोग कहवैं सैं राम नही होता
मनै मेरे आपणे आज थोपडा फेरते देखे हैं
मांग क़ै जुबान लोग ज्यान लेते देख लिए
हीणे मांणसां के यार इम्तेहान लेते देख लिए
देख लिए दुनिया मैं रांझे भी रै बहुत घणे
अरै यार की मरी मैं बैठ ग्यान देते देख लिए
जीत कद होणी कद हार मिलै देखी जागी
मनै दूसरे का महल देख छैन गेरते देखे हैं
माड़े टैम मैं लोग कहवैं सैं राम नही होता
मनै मेरे आपणे आज थोपडा फेरते देखे हैं
जीवते तो पूछ लेता इतिहास के लिखारियाँ नै
पहल्यां भी तै होवैं थी रै गाया क्यूँ ना जारियाँ नै
भाई गलती सै बस नै चलाणिया ड्राइवर की
सफ़र मौत पै चाल्या था बताया ना सवारियां नै
"दीप" के मरे पै थम आँसुआं नै रहण दियो
काळजै के धनी खून के आंसू केरते देखे हैं
माड़े टैम मैं लोग कहवैं सैं राम नही होता
मनै मेरे आपणे आज थोपडा फेरते देखे हैं
माड़े टैम मैं लोग कहवैं सैं राम नही होता
मनै मेरे आपणे आज थोपडा फेरते देखे हैं
@Deep Jangra
टिप्पणियाँ
एक टिप्पणी भेजें